Header Ads

Responsive Ads Here

WAISLAMU DHEHEBU LA SHIA ITHNA ASHERI IMAMIA MWANZA WASHIRIKI IBADA KANISANI



Mwenyekiti wa The Desk & Chair Foundation Sibtain Meghjee ambaye pia ni Mwenyekiti wa The Bilal Muslim Mission of Tanzania Kanda ya Ziwa akisisitiza jambo katika ibada iliyofanyika katika Kanisa la African Inland Church Tanzania (AICT) Bwiru jijini Mwana, mwenyekiti huyo na waumini baadhi ya dini ya Kiislamu waliakwa kushiriki kwenye ibada hiyo ambayo imeandika historia mpya baina ya Waislamu na Wakristo kuwa wote ni wamoja na wanamuabudu Mungu mmoja.Kutoka kushoto wa pili ni Kaimu Katibu Mkuu wa kanisa hilo Philipo Majuja.

NA BALTAZAR MASHAKA, MWANZA

WAISLAMU wa madhehebu ya Shia Ithna Asheri Imamia wamesema kitendo cha Wakristo wa Kanisa la African Inland Church Tanzania (AICT) cha kuwaalika kushiriki Ibada kanisani kimefungua ukurasa mpya kwa waumini wa madhehebu hayo nchini.

Mwenyekiti wa Taasisi ya The Desk & Chair Foundation (TD&CF) Tawi la Tanzania Alhaji Sibtain Meghjee ametoa kauli hiyo juzi katika Ibada iliyofanyika katika Kanisa la AICT Bwiru jijini Mwanza ambapo alikabidhi fimbo 11 kwa walemavu wa macho,vitabu vya Kuran na kalenda kwa waumini wa kanisa hilo.

"Mambo mengi yaliyopo kwenye Biblia na Kuran asilimia 90 yanafanana na kinachotakiwa kwa waumini wa dini zote za Kikristo na Kiislamu ni kuvumiliana kutokana na imani zao na hivyo ushirikiano huo utadumisha amani na utulivu kwenye jamii bila kubaguana kwa kutofautiana kiimani,"amesema.
Sheikh wa Bilal Muslim Mission of Tanzania Sheikh Hashim Ramadhan akitoa neno kwa waumini wa kanisa la AICT Bwiru wakati wa ibada iliyowashirikisha pia waumini wa dini ya Kiislamu akisema wote ni watoto wa baba na mama mmoja na wanamwabudu Mungu mmoja na hakuna sababu ya kuchukiana bali kupendana.

Meghjee ambaye pia ni Mwenyekiti wa The Bilal Muslim Mission of Tanzania Kanda ya Ziwa amesema wapo baadhi ya watu wenye nia mbaya wamekuwa wakieneza propaganda chafu dhidi ya Uislamu wakiwahusisha na mambo mabaya kwenye jamii na kuipongeza serikali kwa kuanzisha kamati ya amani Mkoa wa Mwanza na kuufanya kuwa wa jamii moja bila kubaguana.

"Jamii imejenga tabia ya kuamini propaganda hizo na sisi Waislamu tulianza kurekebisha hali hiyo kwa kufanya kazi za kijamii kwa kuzingatia mafunzo ya dini na malezi ya wazazi.Tujiepushe na propaganda chafu zinazofanywa na watu wanaoropoka mambo bila ya kuwa na elimu (ufahamu) kwani kitendo cha kuwaalika Waislamu kuja kanisani kimefungua ukurasa mpya kwa waumini wa dini zote,"amesema.

Alhaji Meghjee amesema nchini Iraq (nchi ya Kiislamu) maeneo matakatifu ya Wakristo yanalindwa na Serikali na wana uwakilishi bungeni huku gharama za uendeshaji wa makanisa zikilipwa na serikali jambo linaloonyesha waislamu si watu wabaya.
Mmoja wa waumini wa kanisa la AICT Bwiru akipokea kalenda na Kuran kutoka kwa Alhaji Meghjee.

Kwa upande wa Sheikh wa Bilal Muslim Mission Of Tanzania Kanda ya Ziwa Sheikh Hashimu Ramadhani amesema wanadamu wote kwa imani ya dini ya Kiislamu wote ni watoto wa baba na mama mmoja (Adam na Hawa) ingawa makanisani na misikitini kuna waumini wa makabila na rangi mbalimbali lengo ni kushirikiana, kupendana na kushikamana.

Wakati huohuo Mhariri wa Star TV ambaye pia ni Mwenyekiti wa miradi ya maendeleo ya Kanisa hilo la AICT Moses Buhilya amesema Ibada hiyo ya pamoja ya waumini wa dini ya Kiislamu na Kikristo imeonesha ushirikiano, upendo na kuondoa mitizamo ya watu kuwa waumini wa dini hizo waliohasimiana kutokana na imani zao za kidini.

“Kikubwa tumeweza kuondoa tofauti za kidini na kuonyesha tu Watanzania wamoja. Wenzetu wamekuja kujifunza mafunzo yetu (Biblia) na sisi pia kujifunza yao (Kuran), tumeshiriki chakula cha pamoja na kuangalia mahitaji ya kibinadamu na kuyatatua,”amesema Buhilya.

Naye Kaimu Katibu Mkuu wa AICT Mchungaji Philipo Majuja amesema kuwa "kwa niaba ya Wakristo wa AIC Tanzania, siku ya leo(juzi) imeonyesha Wakristo wa Kanisa hili na Waislamu wameketi pamoja kushiriki Ibada na kula pamoja.

"Ujio wenu umetufundisha kuwa Mungu wetu tunayemuabudu ni mmoja na anatupenda sote bila ubaguzi, maana yake Yesu alikuja kuleta amani na hata sisi tunatakiwa kuleta amani katika jamii.”

Ameeleza jamii inapohaingaika na maji ujue hapo hakuna amani na kunukuu katika kitabu cha Zaburi 24: kuwa Nchi na vitu vyote vilivyomo duniani ni mali ya Bwana (Mungu) na hata Nabii Nehemia alipokuwa na mradi wa ujenzi wa ukuta wa Yeruselemu alihitaji ushirikiano na vifaa kutoka kwa watu ambao hawakuwa waumini akafanikiwa na hivyo ushirikiano baina na Waislamu na Wakristo upo hata kwenye maandiko na kwenye jamii na si jambo geni.

No comments